PO:RAG

Updated: Sep 11, 2020

Mising réngamsé doman-tí:manla, yirman-so:manla mé:pola du:lí:né réngamko. Po:ragdé dola:-tí:la, angé-bíro-bírma:ngém odokké yígo-magbom lékopé dobo-tí:bo sunané botténé gí:dísí:píko. Aríg ila turné Misingé guni:-amrom gatsum ge:la manggom bau-amdangém mosíngam ge:la Lobo po:lodo manggom Gínmur po:lo rísondo po:ragém tí:do.



Tagngodokké tagying ara:lo loumdokké longokopé po:ragém tí:do. Po:rag tí:nam légangé mímbír-ya:me: kéba:dok ru:tumpé Migom Borako du:do, odokké mímbír kídí:dok ru:tumpé Borani:kosin du:do. Poag tí:napé bojépakko am-ambíném, eyég-pérogém, nogin-po:ro apongém, pamam ísíngém, oyíng-oge atí attém mokumsupé idag. Odok légangé dítag tagnyi-tagum po:pélokkébo do:lu:dok mímbír-yameyé daglég gíla atí atíém makum suno:dag. Murko: manggom atí atí atta:r pa:nam légangé do:lu:dok mímbír-ya:meyé érang éra:lokké akopé lenna rélékpé sékkaiké ager gerbinamdém 'Daglég' émdo. Daglég gíla pa:nam murkongé bojéko imílo eyég auwém rége:la do:lu:dok mímblrém o:dopé ordag. Édémipé po:rag tí:dídok po:lo pínyi-píum po:pélokkébo apong ké:nam, parpénam ísíng atíém langkumsunam agerém do:lu:dok mímbír-ya:meyé gerno:do.


Po:ragém do:lulok murong okumlo tí:do. Murong okum kama:né do:lungégom po:rag tí:nam légangé anupé murong okumém modo. Pongkogdo bottépagné néríng sínggíkko di:lígge:la lakke-lagbíkpé reyém annyiko sínggígém di:do. Odokké talé:tém tarte: aborongkopé pedge:la odo tase selabém kablígdo. Néríng sínggígdo lang bangku:do appun, simín-sike:, péiyí-péttang atílok moimangém ilígdo. Muro:lo do:lu:dok mímbír-ya:meyé gíkumsula gerpénam réngam agerém ru:sudo. Lekkem do:lu:lok ya:meyé murong okumlo du:la yummém do:lu:do:pé gía:né yumra:lok sumnyo-situm, sité-menjég odokké angu do:lu:lok aima:né taniyém motumdungai. Luségla lumílo, murong okumém Mising dírbílok ki:ni: émna lukandag.


Po:raglo angu do:lu:lok mímbír-ya:meyém minompé gogdo. Do:lu:dokké amilo mida: mola binam mimé appíngém milbong kídí:dém gokté:la po:raglo:pé gogdoku. Migom Boradém lang Borani:dém bínyik okumdokké murong okumdo:pé í:r-pongkírpé yamla po:ragém daksa:do. Odok lédudo mibudém lang minomém muro:do:pé yama:do. Mibudok luyirkampé uyu atíém ido. Yumédo po:borém kaddo. Mibu dagdolo mímbír-ya:me: appíngé rélékpé dagmíndo. Mibbo dagge:la a:péné longé kídí:do do:lu:lok ainam-aimangém lubido. Minompé gognam mímbir ya:meyéla: do:lu:dok mímbír-ya:meyé songka: moka:mínsudo.


Po:rag tí:sa:do longédo minomém dobo-tí:boge:la yamlen lígdoku. Odok lédudo goglígnam mimé kídí:démla: buluk milbong kídí:dém, ko:-ko:né:ngém, odok lédudo do:lu:dok mimé kídí:dém, odokké do:lu:dok

ake tani: kídí:dém domo-tí:modag. Édémpé po:raglo réngamé doman-rí:mando.


Source~

Book- Ngoluk Potin





50 views0 comments

All About Mising

A website created with the sole purpose of promoting, displaying, and preserving the language and culture of the Mising tribe.

Join Our Community

Get weekly updates

Quick Links

Enter your email here.

  • Facebook
  • Twitter
  • YouTube
  • Pinterest
  • Instagram

Copyright  2020-2021 @ All About Mising