Ngoluk Mége:l Gínam Longé Kídí:dém

Updated: Sep 13, 2020

✒️Dipti Rani Pegu


Mé:pa:dakkun édé longédém ajona

Ajon buluk lottadok papi so:nam kídí:dém,

A:né rago ru:yi:dok kolabati kotkol gínamdém


Ajona no silo mitpan du:néi,

Ngoluk kouang kodgo:l donamdém

Aríg aríglo menjég taye:d tedge:la

Tu:tog mudla sí:sangké asiném Rékkud monamdém

Ajona silo no mépagla gínam longngém

Gílad língku ma:néi

No mitpan tokunéi!

Ajona no kindang

Ngo mitpanpé émna

Mé:daggom mitpan la:mang


Ajona no mé:pa:dang

Élé ngoluk gedop ka:nam

Arígolok takom piko gínamdém


A:m gadrug gadrugdok

A:m sotanam kídí:dém

Mitpandu:néi no?

Yumdéng ayirdok

Po:lo lolad latkodo

Pati: tayé:d tedge:la

Ya:yok kínam leke do:ying kídí:dém

Ngo:dan mitpan la:mang.


Télé Po:loké lédul lenmínné

Tamuli takarké mikkí migyar

Binamdé aropé

Aipé mé:pa:dag

Lungab la:mang lutér kamang

Lulíngém lusaram la:mang

Asinang odaggom pa:lad langkumang

Ayiré ngolum gígé bomdung...

Gímínpa:dung ngolu

Ageré ngolum ní:yud lígdung

Ayirké lédulo du:mín dopé

Lékod pa:lad langkumang

Sí:sangém sí:ten langkumang.

207 views0 comments

All About Mising

A website created with the sole purpose of promoting, displaying, and preserving the language and culture of the Mising tribe.

Join Our Community

Get weekly updates

Quick Links

Enter your email here.

  • Facebook
  • Twitter
  • YouTube
  • Pinterest
  • Instagram

Copyright  2020-2021 @ All About Mising